बोरिवलीत अंत्यसंस्कार नाहीच… मॉरिसला अखेर कुठे दफन केले?; नवी अपडेट काय?

 दहिसरमध्ये शिवसेना ठाकरे गटाचे नगरसेवक अभिषेक घोसाळकर यांच्यावर गोळीबार करण्यात आला. आरोपी मॉरिसने फेसबूक लाइव्ह दरम्यान घोसाळकर यांच्यावर गोळ्या झाडल्या. त्यात त्यांचा मृत्यू झाला. नंतर मॉरिसने स्वत:वरही गोळीबार करून आत्महत्या केली. या संपूर्ण प्रकरामुळे काल मुंबईतच नव्हे तर राज्यभरातही खळबळ माजली. विरोधक तर सरकारवर तुटून पडले होते. विरोधकांनी राज्य सरकारवर टीका करत मुख्यमंत्री आणि गृहमंत्र्यांवर निशाणा साधला.

त्यानंतर काल दुपारी अभिषेक घोसाळकर यांच्या पार्थिवावर अंत्यसंस्कार करण्यात आले. मात्र घोसाळकर यांच्या हत्येनंतर दहिसर परिसरात तणावाचे वातावरण होते. कालही या भागात बराच तणाव होता. आज परिस्थिती काहीशी निवळली असली तरी आजही येथील सर्व दुकाने बंद आहेत. हा गोळीबार जेथए झाला त्या मॉरिसच्या कार्यालयाबाहेर तसेच घोसाळकरांच कार्यालय व आजूबाजूच्या परिसरातही कडेकोट पोलीस बंदोबस्त ठेवण्यात आला आहे. माजी नगर सेवक असलेले अभिषेक घोसाळकर यांचे हे जनसंपर्क कार्यालय आहे. आणि इथून थोड्याच अंतरावर मॉरिसचे हे कार्यालय आहे ज्यामध्ये मॉरिसने अभिषेक घोसाळकर यांची गोळ्या घालून हत्या केली होती, सध्या हे कार्यालय पोलिसांनी सील केले आहे.

बोरिवलीत अंत्यसंस्कार नाहीच… मॉरिसला अखेर कुठे दफन केले ?

दरम्यान अभिषेक घोसाळकर याच्यावर गोळीबार केल्यानंतर स्वतःवरही गोळ्या झाडून घेणाऱ्या मॉरिस नरोना ऊर्फ मॉरिस भाई यानेही आत्महत्या केली. मात्र त्याचा मृतदेह चर्चच्या आवारात दफन करू देण्यास स्थानिकांनी विरोध दर्शवला होता. लेडी ऑफ द इमॅक्युलेट कँसेप्शन चर्च चे फादर जेरी यांनीही मृतदेह दफन करण्यास विरोध केला असल्याची माहिती समोर आली होती. अखेर आरोपी मॉरिस भाई याच्यावर काल महालक्ष्मी येथे अंत्यसंस्कार करण्यात आले. चर्चच्या परिसरात त्याचा दफनविधी करण्यास स्थानिकांवनी कडाडून विरोध दर्शवला होता. त्यामुळे महालक्ष्मी येथे त्याच्यावर अंत्यसंस्कार करण्यात आले होते.

मॉरिसचा सुरक्षारक्षक ताब्यात

मॉरिसने अभिषेक घोसाळकर याच्यावर ज्या पिस्तूलातून गोळीबार केला ते त्याच्या बॉडीगार्डचं होतं. अमरेंद्र मिश्रा असे त्याच्या बॉडीगार्डचे नाव असून 2002 मध्ये त्याला पिस्तूलाचं लायसन्स मिळालं होतं. मिश्राने उत्तर प्रदेशातून पिस्तुल नुतनीकरण केल्याचेही पुरावेदेखील समोर आले आहेत. हीच पिस्तुल मॉरिसने घोसाळकर यांच्या हत्येसाठी वापरली. घटनेच्या वेळी माझ्या पतीला मॉरिसने त्याचा मित्र मेहुल पारेखसोबत रूग्णालयात पाठवले होते. मेहुलची आई करुणा रुग्णालयात एडमिट आहे तिकडे हे दोघेही गेले होते, असे बॉडीगार्ड मिश्रा याच्या पत्नीने पोलिसांना सांगितले होते. या प्रकरणाचा तपास करणाऱ्या मुंबई गुन्हे शाखेच्या पथकाने काल मॉरिशच्या सुरक्षा रक्षक मिश्राला अटक केली असून आज त्याला न्यायालयात हजर करण्यात येणार आहे.

MHB पोलीस आणि मुंबई गुन्हे शाखेचे पथक या हत्येमागील कारण शोधत आहेत. मिळालेल्या माहितीनुसार, पोलिसांनी आतापर्यंत 10 ते 12 जणांचे जबाब नोंदवले आहेत, आजही पोलिस काही जणांचे जबाब नोंदवणार आहेत.

अमरेंद्र मिश्राची पत्नी काय म्हणाली  ?

सोनी मिश्रा यांनी सांगितल्यानुसार मॉरिस भाईच्या डोक्यात सर्व काही आधीच ठरलं होतं. अभिषेक घोसाळकर यांना संपवणार असल्याचं वारंवार ते बोलत असल्याचं त्याच्या पत्नीने जबाबात म्हटलं आहे. मॉरिस भाई याने हत्सेसाठी बंदुक मिळवण्यासाठी परवाना असलेला बॉडीगार्डलाच कामावर ठेवलं.  कामावर ठेवताना त्याने गन कायम कार्यालयातील ड्रॉव्हरमध्ये ठेवायची अशी अट घातली होती.