ऑनलाइन अभ्यासाने घेतला जीव : अभ्यासात अडचण, नाशिकमध्ये अकरावीच्या विद्यार्थिनीने गळफास घेतला; दोन महिन्यांत तिसरी विद्यार्थ्याची आत्महत्या

महाराष्ट्रातील नाशिकमध्ये एक धक्कादायक घटना समोर आली आहे. येथे ऑनलाइन अभ्यास करताना येणाऱ्या अडचणींमुळे अकरावीच्या विद्यार्थिनीने गळफास घेऊन आत्महत्या केली आहे. ही घटना जिल्ह्यातील आदिवासी अलंगुन भागातील आहे. हे प्रकरणही गंभीर आहे, कारण गेल्या दोन महिन्यांत नाशिकमध्ये ऑनलाइन अभ्यासामुळे आत्महत्या करणारा हा तिसरा विद्यार्थी आहे.

भारती तुकाराम चौधरी (१७) असे मृत विद्यार्थिनीचे नाव आहे. ती पोस्ट बेसिक एडेड आश्रम शाळा, अलंगून येथे विज्ञान शाखेत शिकत होती. आर्थिकदृष्ट्या कमकुवत असल्याने त्यांच्याकडे मोबाईल फोन नव्हता. यामुळे ती सतत अभ्यासात मागे पडत होती. अनेकवेळा ती इतर विद्यार्थ्यांच्या घरी जाऊन वर्गात सहभागी होत असे.

अभ्यासात इतर विद्यार्थ्यांच्या मागे राहिल्याने ती सतत तणावाखाली होती आणि सोमवारी तिने राहत्या घरी गळफास घेऊन आत्महत्या केली. विद्यार्थिनीच्या घरी तिचे आई-वडील, भाऊ व बहीण होते. पोलिसांना घरातून एक सुसाईड नोट सापडली असून, त्यात विद्यार्थिनीने ऑनलाइन अभ्यासात येणाऱ्या अडचणींमुळे तिच्या मृत्यूचे कारण सांगितले आहे.

दोन महिन्यांतील तिसरी घटना
काही दिवसांपूर्वी सुरगाणा तालुक्यातील शिंदे दिगर येथील आश्रमशाळेत पाचवीच्या विद्यार्थ्याने आत्महत्या केली होती. त्याचा मृतदेह लोखंडी रॉडच्या मधोमध आढळून आला. डिसेंबरमध्ये हर्सूलजवळील बोरीपाडा शासकीय आश्रमशाळेत नववीच्या विद्यार्थ्याने आत्महत्या केली होती. आदिवासी विकास विभागाने स्थापन केलेली ही राज्यातील पहिली आश्रमशाळा आहे. तिन्ही विद्यार्थी अभ्यासात हुशार असल्याचे तपासात समोर आले आहे.

आदिवासी भागातील शिक्षणाची स्थिती वाईट आहे
नाशिक जिल्ह्यातील अनेक आदिवासी भागात राहणाऱ्या लोकांची आर्थिक स्थिती बिकट आहे. त्यामुळे विद्यार्थ्यांना मोबाईल फोन विकत घेणे आणि रिचार्ज करणे अवघड झाले आहे. उद्धव सरकार आल्यानंतर येथील विद्यार्थ्यांसाठी आश्रमशाळेतून शिक्षण सुरू झाले, मात्र कोरोनाच्या साथीमुळे हे शिक्षण थांबले. सोमवारपर्यंत ऑनलाइन माध्यमातूनच अभ्यास केला जात होता. आदिवासी भागात नेटवर्किंग ही समस्या आहे, त्यामुळे अनेक वेळा विद्यार्थ्यांना झाडावर चढून अभ्यास करावा लागतो.