વિકાસ એકદમ યાદ આવ્યો:પહેલાં UP હવે ગુજરાત, વિધાનસભા ચૂંટણી પહેલા જ મેટ્રો દોડાવશે, 2024ની લોકસભા ચૂંટણી પહેલા બુલેટ ટ્રેનનો ફેઝ-1ને પૂરો કરી દેવાશે

• કેટલાક પ્રોજેક્ટો ફાસ્ટટ્રેક મોડ પર પૂર્ણ કરવા માટે ગુજરાત સરકારનું આયોજન
• 28 ડિસેમ્બરે PM મોદીએ કાનપુર મેટ્રોને લીલીઝંડી બતાવી

ઉત્તરપ્રદેશ વિધાનસભા ચૂંટણી આડે હવે ગણતરીનાં અઠવાડિયાં જ બાકી રહ્યાં છે, જેને પગલે વડાપ્રધાન નરેન્દ્ર મોદી એક બાદ એક યોજનાઓનું લોકાર્પણ કરી રહ્યા છે. 28 ડિસેમ્બરના રોજ PM મોદીએ કાનપુર મેટ્રોને લીલી ઝંડી બતાવી હતી. ઉત્તરપ્રદેશ બાદ વર્ષના અંતમાં ગુજરાત વિધાનસભા ચૂંટણી પણ યોજાશે, જેને પગલે ગુજરાતમાં પણ વિકાસ યાદ આવ્યો હોય એ રીતે કેટલાક પ્રોજેક્ટો ફાસ્ટટ્રેક મોડ પર પૂર્ણ કરવા માટે ગુજરાત સરકારે આયોજનો કર્યાં છે, જેમાં PM મોદીના બે ડ્રીમ પ્રોજેક્ટ એવા અમદાવાદ મેટ્રો અને મુંબઇ–અમદાવાદ વચ્ચેના બુલેટ ટ્રેન પ્રોજેક્ટને ઝડપથી પૂર્ણ કરવાનો નિર્ણય કર્યેા છે.

આ બન્ને પ્રોજેક્ટમાં આવતી તમામ અડચણો દૂર કરી 2022ની વિધાનસભા ચૂંટણી સુધીમાં 2014થી ચાલતો મેટ્રોનો ફેઝ-1 તેમજ 2024ની લોકસભાની ચૂંટણી પહેલાં બુલેટ ટ્રેનનો એક ફેઝ પૂર્ણ કરવાના આદેશ આપવામાં આવ્યા છે.

तस्वीरों में खबर3 फोटो

સાબરમતી સ્ટેશનની ડિઝાઇન મંજૂર કરવાની પ્રક્રિયા શરૂ
નેશનલ હાઇસ્પીડ રેલ કોર્પેારેશને અમદાવાદ રેલવે સ્ટેશનના છેડે આવેલા સરસપુરમાં બુલેટ ટ્રેન માટે સ્ટેશન કમ કોરિડોરના બાંધકામ માટે કોન્ટ્રેક્ટ આપી દીધો છે. હવે સ્ટેશન તેમજ એલિવેટેડ કોરિડોરનું કામ શરૂ કરવામાં આવ્યું છે. અમદાવાદ–મુંબઈ બુલેટ ટ્રેન માટેનો કોરિડોર હાલના રેલવે સ્ટેશનના પ્લેટફોર્મ 11 અને 12 પર રહેશે. આ સાથે સાબરમતી સ્ટેશનની પણ ડિઝાઇન મંજૂર કરવામાં આવી રહી હોવાનું સરકારના સૂત્રોએ જણાવ્યું હતું.

કોરિડોરનું કામ ઓગસ્ટ 2022 સુધીમાં પૂર્ણ કરવાનું આયોજન
આ ઉપરાંત કાલુપુર રેલવે સ્ટેશને અમદાવાદ મેટ્રોનું અંડરગ્રાઉન્ડ, હાલના રેલવે સ્ટેશનનું ગ્રાઉન્ડ લેવલ અને બુલેટ ટ્રેનનું એલિવેટેડ સ્ટેશન એકસાથે રહેશે, જ્યારે સાબરમતી ખાતે હાલનું રેલવે સ્ટેશન અને મેટ્રો એકસાથે હશે. આગામી 2022માં યોજાનારી ગુજરાત વિધાનસભની ચૂંટણી પહેલાં અમદાવાદ મેટ્રો રેલના પ્રથમ તબક્કાને પૂર્ણ કરવાનું આયોજન કરવામાં આવ્યું છે. છેલ્લાં 13 વર્ષથી વિલંબમાં પડેલા મેટ્રો પ્રોજેક્ટનું અમદાવાદના પૂર્વ–પશ્ચિમ અને ઉત્તર–દક્ષિણ કોરિડોરનું કામ ઓગસ્ટ 2022 સુધીમાં પૂર્ણ કરવાનું આયોજન કરવામાં આવ્યું હોવાનું સૂત્રોએ જણાવ્યું હતું.

આ ઉપરાંત બુલેટ ટ્રેનનો પ્રોજેક્ટ પણ જાપાનની લોન સાથે શરૂ કરવામાં આવ્યો છે. અમદાવાદથી મુંબઈના 508 કિલોમીટરના વિસ્તારને આ બુલેટ ટ્રેન પ્રોજેક્ટમાં આવરી લેવામાં આવ્યો છે. આ પ્રોજેક્ટને પહેલાં 2023 સુધીમાં પૂર્ણ કરવાનો હતો, પરંતુ જમીન સંપાદનની અડચણો આવતાં એમાં વિલંબ થયો છે. પહેલાં આ પ્રોજેક્ટ માટે 98 હજાર કરોડનો ખર્ચ અંદાજવામાં આવ્યો હતો, પરંતુ વિલબં થતાં હવે 1.08 લાખ કરોડનો ખર્ચ અંદાજવામાં આવ્યો છે.

અમદાવાદ મેટ્રોના બીજા ફેઝમાં 28.05 કિ.મી. વિસ્તાર આવરી લેવાશે
જ્યારે અમદાવાદમાં મેટ્રો ટ્રેનના ફેઝ-1માં 40.03 કિલોમીટરનું અંતર છે, જે બીજા ફેઝમાં ગાંધીનગર પહોંચશે ત્યારે વધુ 28.05 કિલોમીટરનો વિસ્તાર આવરી લેશે. મેટ્રોની જ્યારે જાહેરાત કરવામાં આવી હતી ત્યારે 2006માં પ્રોજેકટ ખર્ચ 5000 કરોડ, 2014માં 9000 કરોડ અને હવે 12000 કરોડ રૂપિયાનો ખર્ચ અંદાજવામાં આવ્યો છે.

ફેઝ-2ની મેટ્રો ડિસેમ્બર 2023માં દોડતી થશે
અમદાવાદમાં ફેઝ-1નું કામ 80.50 ટકા પૂર્ણ થયું છે, જ્યારે ફેઝ-2ની કામગીરી હજી 6.50 ટકા પૂર્ણ થયેલી છે, જેથી ફેઝ-2ની મેટ્રો ડિસેમ્બર 2023માં દોડતી થઈ જશે, એવું સરકારે લોકસભાના પ્રશ્નોત્તરીકાળમાં જણાવ્યું હતું.

Abhishek Raghuvanshi

+ Follow Subscribe