બલ્ગેરિયન મહિલાએ પ્રખ્યાત ફાર્માસ્યુટિકલ કંપનીના CMD પર લગાવ્યા ગંભીર આરોપ, હાઈકોર્ટના આદેશ બાદ નોંધાયો કેસ.

હાઈકોર્ટના નિર્દેશો પર કામ કરતી ગુજરાત પોલીસે બલ્ગેરિયન મહિલાની ફરિયાદ પર કેડિલા ફાર્માસ્યુટિકલ્સના ચેરમેન અને મેનેજિંગ ડિરેક્ટર (સીએમડી) રાજીવ મોદી વિરુદ્ધ બળાત્કાર, હુમલો અને ઈરાદાપૂર્વક અપમાનનો કેસ નોંધ્યો છે. આ મામલામાં ફાર્મા કંપનીના અન્ય કર્મચારી જોન્સન મેથ્યુ સામે પણ ગેરવર્તણૂક સહિતની વિવિધ કલમો હેઠળ કેસ નોંધવામાં આવ્યો છે.

ડેપ્યુટી પોલીસ કમિશનર (ડીસીપી) લવિના સિન્હાએ કહ્યું કે કોર્ટે પોલીસ તપાસનો નિર્દેશ આપ્યો છે અને બે મહિનામાં રિપોર્ટ સબમિટ કરવા કહ્યું છે. અમે તપાસ કરીને રિપોર્ટ કોર્ટમાં રજૂ કરીશું.

ફરિયાદીએ શું કહ્યું?
ફરિયાદીએ પોતાની અરજીમાં જણાવ્યું હતું કે તે ફ્લાઇટ એટેન્ડન્ટની નોકરી માટે 24 નવેમ્બર, 2022ના રોજ ભારત આવી હતી અને એક ફાર્માસ્યુટિકલ ફર્મમાં જોડાઈ હતી. તેણીની જોબ પ્રોફાઇલ બદલાઈ ગઈ હતી અને તેણીને પર્સનલ એટેન્ડન્ટ બનાવવામાં આવી હતી અને સીએમડી સાથે જોડવામાં આવી હતી.

ફરિયાદીનો આરોપ છે કે નોકરી દરમિયાન તેણીનું જાતીય સતામણી કરવામાં આવી હતી અને જ્યારે તેણીએ વિરોધ કર્યો ત્યારે તેણીને 3 એપ્રિલ, 2023 ના રોજ નોકરીમાંથી કાઢી મૂકવામાં આવી હતી. અગાઉ મેજિસ્ટ્રેટે મહિલાની ફરિયાદ ફગાવી દીધી હતી.