ગુજરાતમાં ટૂંક સમયમાં બુલેટની ઝડપે દોડતી જોવા મળશે બુલેટ ટ્રેન, પ્રોજેક્ટ માટે જમીન સંપાદનનું કામ પૂર્ણ

અમદાવાદ. નેશનલ હાઈ સ્પીડ રેલ કોર્પોરેશન લિમિટેડ (NHSRCL) એ સોમવારે જણાવ્યું હતું કે તેણે મુંબઈ-અમદાવાદ બુલેટ ટ્રેન પ્રોજેક્ટ માટે ગુજરાતમાં 100 ટકા જમીન સંપાદન પૂર્ણ કર્યું છે.

951 હેક્ટર જમીન સંપાદન કરવાની જરૂર છે
NHSRCLએ જણાવ્યું હતું કે ગુજરાતમાં છેલ્લો પ્લોટ સપ્ટેમ્બરમાં સુરત જિલ્લાના કાથોર ગામમાં હસ્તગત કરવામાં આવ્યો હતો. આ પ્રોજેક્ટ માટે ગુજરાતના આઠ જિલ્લાઓમાં કુલ 951.14 હેક્ટર જમીન સંપાદિત કરવાની હતી.

નવીનતમ સંપાદન સાથે, ગુજરાત, મહારાષ્ટ્ર અને કેન્દ્રશાસિત પ્રદેશ દાદરા અને નગર હવેલી, દમણ અને દીવમાં પ્રોજેક્ટ માટે 99.95 ટકા જમીન સંપાદિત કરવામાં આવી છે.

તેમણે માહિતી આપી હતી કે બુલેટ ટ્રેનનું ઓપરેશનલ કંટ્રોલ સેન્ટર સાબરમતી, અમદાવાદમાં હશે અને ત્યાં ત્રણ ડેપો હશે. આમાંથી બે ડેપો ગુજરાતમાં સુરત અને સાબરમતીમાં હશે જ્યારે એક મહારાષ્ટ્રના થાણેમાં હશે. સરકાર 2026 સુધીમાં દક્ષિણ ગુજરાતના સુરત અને બીલીમોરા વચ્ચે બુલેટ ટ્રેનના પ્રથમ તબક્કાનું સંચાલન શરૂ કરવા માંગે છે.

વડાપ્રધાન નરેન્દ્ર મોદી અને તેમના જાપાની સમકક્ષ શિન્ઝો આબેએ 14 સપ્ટેમ્બર 2017ના રોજ અમદાવાદમાં આ પ્રોજેક્ટની શરૂઆત કરી હતી. અંદાજે 508 કિલોમીટરની સફર બુલેટ ટ્રેન દ્વારા ત્રણથી સાડા ત્રણ કલાકમાં પૂરી થવાની ધારણા છે.