LCB-ખાણ ખનીજ વિભાગની કાર્યવાહી:સરહદી માર્ગોના કામોમાં ચોરાઉ ખનીજના વપરાશનું કારસ્તાન; ઇન્ડિયાબ્રિજ પાસેથી ઓવરલોડ 41 ડમ્પરને એકસાથે ઝડપી લીધા

• સિઝ કરાયેલા પથ્થર અને કપચીનો રોડના કામમાં કરાતો હતો ઉપયોગ
• ધર્મશાળા પાસે વાહનો ખડકી કબ્જો ખાવડા પોલીસને સોંપાયો, માત્ર ખાણ ખનીજ વિભાગનો દંડ 80 લાખથી 1 કરોડ પહોંચવાની સંભાવના : આરટીઓ ઓવરલોડ સંદર્ભે અલગથી ફટકારશે દંડ

જે વિસ્તાર પ્રતિબંધિત ગણાય છે અને જ્યા સરળતાથી લોકોને પ્રવેશ મળતો નથી. તેવા રણકાંધીના વિસ્તારમાં ગેરકાયદે રીતે ઓવરલોડ ખનીજ ભરેલા વાહનોનું પરિવહન થતું હોવાની બાતમીના આધારે પશ્ચિમ કચ્છ એલસીબી,ખાણ ખનીજ વિભાગ અને આરટીઓની ટીમેnકાર્યવાહી કરીને એકસાથે 41 ડમ્પરો ઝડપી લીધા છે.ઓવરલોડ અને ખનીજચોરીના દુષણ સામે સરકારી વિભાગોની સંયુક્ત તવાઈથી ગેરપ્રવૃત્તિ કરતા તત્વોમાં ફફડાટ ફેલાઈ ગયો છે.

આ અંગેની વિગતો મુજબ,લાંબા સમયથી ખાવડાના સરહદી વિસ્તારમાં ઓવરલોડ ટ્રકો ચાલતી હોવાની ફરીયાદ મળતા આ દુષણને અટકાવવા માટે સંયુક્ત કાર્યવાહી કરવામાં આવી હતી.પોલીસ અધીક્ષક સૌરભ સિંધ દ્વારા પશ્ચિમ કચ્છ જિલ્લામાં થતી ગેરકાદેસર ખનીજ ચોરી તેમજ ઓવરલોડ વાહનોની અવર-જવર અટકાવવા આપેલ સુચના અન્વયે એલ.સી.બી. ભુજના ઇન્ચાર્જ પોલીસ ઇન્સ્પેકટર એચ.એમ.ગોહિલના માર્ગદર્શન હેઠળ સ્ટાફના કર્મચારીઓ પ્રયત્નશીલ હતા ત્યારે ઇન્ડીયાબ્રીજ ચેક પોસ્ટ પાસે પહોચતા ખાવડા તરફથી પત્થરો(લાઇમ સ્ટોન) તથા કપચી (બ્લેક ટ્રેપ) ભરેલ ડમ્પરો આવતા જે ડમ્પરો રોકાવી આધાર-પુરાવાની માંગણી કરાઈ હતી.ઓવરલોડ પરિવહન હોવાથી 41 ડમ્પર ઝડપી પડાયા હતા.

પશ્ચિમ કચ્છ ભૂસ્તરશાસ્ત્રી યોગેશ મહેતાએ જણાવ્યું કે,લાંબા સમયથી ફરિયાદો મળી હતી. જેથી પ્લાનિંગ કરીને સયુંકત રીતે કાર્યવાહી કરવામાં આવી છે.સિઝ કરાયેલા 41 ડમ્પરમાં નોર્મલ લાઇમસ્ટોન અને બ્લેકટ્રેપ ભરેલા હતા. ખાવડા વિસ્તારમાં આવેલી લિઝમાંથી તે ભરાયા હતા.રોયલ્ટી અને પાસ પરમીટ વગર પરિવહન કરવામાં આવતા તમામ 41 ડમ્પરો સિઝ કરીને ધર્મશાળા બીએસએફ કેમ્પ ખાતે રાખી તેની કસ્ટડી ખાવડા પોલીસને સોંપવામાં આવી છે. એક ડમ્પરમાં દોઢ થી બે લાખ રૂપિયાનો દંડ કરવામાં આવશે જેથી 80 લાખ થી 1 કરોડ રૂપિયાનો દંડની વસુલાત કરવામાં આવશે તેવું જણાવ્યું હતું.

ઉલ્લેખનીય છે કે,કચ્છના પ્રતિબંધીત વિસ્તારમાં કામો શરૂ થઇ જતા હવે લોકોની ચહલ-પહલ વધી છે. પરંતુ વિકાસની સાથે હવે દુષણનો પણ પગપેસારો થયો છે અને ઓવરલોડ વાહનો અહીં ચાલી રહેલા કામમાં દોડી રહ્યા છે. એકસાથે જે 41 ડમ્પરો સિઝ કરવામાં આવ્યા છે.તેમાં ભરેલું ખનીજ અહીં ચાલી રહેલા રોડના કામમાં વપરાતું હોવાનો ઘટસ્ફોટ થવા પામ્યો છે.જાહેર રસ્તાઓ તો ઠીક પરંતુ જ્યાં લોંખડી સુરક્ષાની તૈનાતી છે. તેવા વિસ્તારમાં પણ ડર વગર થતી આવી પ્રવૃતી જોખમી છે.પશ્ચિમ કચ્છ એલસીબીના પીઆઇ હાર્દિકસિંહ ગોહિલ,ખાણખનીજ અધિકારી યોગેશ મહેતાની ટીમે બોલાવેલો સપાટો કાબીલેદાદ છે.

લિઝની તપાસણી કરી માપણી કરવામાં આવશે : ભૂસ્તરશાસ્ત્રી
પશ્ચિમ કચ્છ ખાણ ખનીજ વિભાગના ભૂસ્તરશાસ્ત્રી યોગેશ મહેતાએ જણાવ્યું કે, સ્થળ પરથી 41 ડમ્પરો સિઝ કરવામાં આવ્યા છે. ડમ્પરોમાં ભરેલ નોર્મલ લાઇમસ્ટોન અને બ્લેકટ્રેપ ખનિજ કઇ લિઝમાંથી ભરવામાં આવ્યું છે તેની તપાસણી કરવામાં આવશે તેમજ આ લિઝની માપણી કરીને ખનીજચોરી કરાઇ છે કે કેમ તેની તપાસ કરી ગેરરીતી જણાઈ આવશે તો દંડકીય કાર્યવાહી કરવામાં આવશે.