નુકસાનનો ભય:ઓલપાડમાં વરસાદ, તૈયાર ડાંગર પર પાણી ફરી વળ્યું

• ગાજવીજ સાથે પડેલા વરસાદને કારણે કાપેલા ડાંગર ભીંજાઇ જતાં મુશ્કેલી

ઓલપાડ તાલુકામાં ગુરુવારે બપોર બાદ અચાનક વાતાવરણમાં પલટો આવતા પવન અને ગાજવીજના કડાકા ભડાકા વચ્ચે તાલુકાના કેટલાક વિસ્તારમાં ધોધમાર વરસાદ ખાબકયો હતો, જેને લઈ ખેડૂત આલમ મુશ્કેલીમાં મુકાયા છે અને ડાંગર પકવતા ખેડૂતોને ફરી એકવાર નુકશાની વેઠવાનો વારો આવ્યો છે.

એક બાજુ ચોમાસુ ડાંગરનો ઉભો પાક તૈયાર થઈ ગયેલો જોવા મળે છે ત્યારે કેટલાક ખેડૂતો ડાંગરનો પાક લણણી કરવા જોતરાઈ ગયા હતા. ઓલપાડ તાલુકા સહિતના કેટલાક વિસ્તારમાં ખેડૂતોએ ડાંગર પાકને કાપીને ખેતરોમાં જુડવાની પ્રક્રિયા ખેતમજૂરો કરી રહ્યા હતા. તેવા સમયે વાતાવરણમાં પલટો આવતા તાલુકાના કેટલાક ગ્રામ્ય વિસ્તારમાં વરસાદ પડતા પોતાનો પાક બચાવવા દોડા દોડી કરવી પડી હતી. તો બીજી તરફ ડાંગરના પરાળ પણ ભીંજાઇ જવા પામ્યા હતા. આજરોજ પડેલા વરસાદને લઈ ડાંગરની કાપણી કરી ખેતરોમાં પડ્યું હતું તે ડાંગર ભીંજાઈ જતા ખેડૂતોને નુકશાન પહોંચ્યું છે. તેવું ખેડૂતો પાસેથી જાણવા મળ્યું હતું. હજુ પણ તાલુકામાં ડાંગરનો ઉભો પાક તૈયાર થઈને લહેરાઈ રહ્યો છે. પરંતુ વરસાદની આગાહી છે અને ખેતીના પાકોને નુકશાન થશે તેવી હાલની સ્થિતિમાં ડાંગરનો પાક કાપવો કે ન કાપવો તે દ્વિધામાં મુકાયેલા જોવા મળે છે.