કાર્યવાહી:બુટલેગરને પાસાની ધમકી આપી 2 લાખનો તોડ કરનાર કોન્સ્ટેબલ ઝબ્બે

• નાના વરાછા તુલસી હોટલ પાસેની ઘટનામાં 3 સામે ગુનો દાખલ
• કાપોદ્રા પોલીસમાં ફરિયાદ આપતા સમયે કોન્સ્ટેબલને જોતા ભાંડો ફૂટ્યો

ઓનલાઇન સાડીના વેપાર સાથે દારૂની ખેપ મારતા બુટલેગરને નાના વરાછા પાસે 3 લોકોએ પોલીસ તરીકે ઓળખ આપી પાસા કરાવી દેવાની ધમકી આપી 2 લાખનો તોડ કર્યો હતો. આ મામલે બુટલેગર કાપોદ્રા પોલીસ મથકે ફરિયાદ કરવા જતા તેણે ત્યાં તોડ કરનાર કોન્સ્ટેબલને જોતા ભાંડો ફૂટી ગયો હતો. જેમાં બુટલેગરે કાપોદ્રા પોલીસના કોન્સ્ટેબલના સહિત 3 સામે ગુનો નોંધાવતા પોલીસે ધરપકડ કરી હતી.

મુળ ભાવનગરના અને હાલ ઉત્રાણના રિવેરા એપાર્ટમેન્ટમાં રહેતા અજય સવાણી ઓનલાઇન સાડીનો વેપાર કરે છે. જેમાં અજયને વધારે કામ ન મળતા તે દારૂનો ધંધો કરવા લાગ્યો હતો. ગત તા. 23મીના રોજ બપોરે અજાણ્યાએ ફોન કરીને દારૂ મંગાવ્યો હતો. અજયે અજાણ્યાને નાના વરાછા ચોપાટી પાસે બોલાવ્યા હતા. ત્યાં અજય બોટલ આપવા ગયો હતો.

થોડીવારમાં બીજીવાર ફોન આવતા અજય નાના વરાછાની તુલસી હોટેલ પાસે બીજી બોટલ આપવા માટે ગયો હતો. અજય અજાણ્યાને દારૂ આપવા જઇ રહ્યો હતો ત્યારે ત્યાં એક યુવકે તેનો કોલર પકડીને શું છે તારી પાસે..? કહી ગાળો આપી હતી. તેણે અજયને કારમાં બેસાડીને ધમકાવ્યો હતો. અમારી પાસે બીજી 10 બોટલ છે તે તારા નામે કરીને તને પાસા કરાવી દઇશ કહીને 5 લાખ માંગ્યા હતા. 2 લાખમાં સમાધાન થતા અજયે મિત્રો તેમજ ઘરેથી દવાખાનાનું કહીને 2.02 લાખ મંગાવી ત્રણેય અજાણ્યાને આપ્યા હતા. રૂપિયા લઇ ત્રણેયએ અજયને છોડીને ભાગી ગયા હતા.

બે દિવસ પહેલા બુટલેગર અજય સવાણી ફરિયાદ આપવા માટે કાપોદ્રા પોલીસ મથકે ગયો હતો. ત્યાં 12 દિવસની રજા બાદ હાજર થયેલા ચિંતન રાજ્યગુરુને જોઇ ગયો હતો. અજયે જોરથી બુમ પાડી કે, ‘મારી સાથે રૂપિયાનો તોડ કરનાર આ વ્યક્તિ હતો ’તેની સાથે જ ત્યાં પોલીસના અન્ય માણસો પણ ભેગા થઇ ગયા હતા. ત્યારબાદ કાપોદ્રા પોલીસે ચિંતન રાજ્યગુરુ તેમજ તેના બે મિત્રોની સામે ગુનો નોંધી તેની ધરપકડ કરી હતી.