સરકારે સંસદમાં કહ્યું, ‘ગુજરાતમાં કોરોનાથી 20 ડૉક્ટરનાં મોત થયાં’, હકીકતમાં 20 નહીં, 95 ડૉક્ટરનાં મોત થયાં; આ રહ્યું લિસ્ટ

• કોરોના મોત મુદ્દે વધુ એક જુઠ્ઠાણું ખુલ્લું પડ્યું; ગુજરાત સરકારે કેન્દ્રને ડૉક્ટર્સનાં મોતના ખોટા આંકડા આપ્યા
• IMAની યાદી મુજબ અમદાવાદમાં 23 ડૉક્ટરે જીવ ગુમાવ્યા, સુરતમાં 15 અને વડોદરામાં 9 તબીબનાં કોરોના સંક્રમણથી મોત થયાં હતાં

ગુજરાત સરકારે આપેલા આંકડાઓના આધારે કેન્દ્ર સરકારે બે દિવસ પહેલાં સંસદમાં જણાવ્યું હતું કે રાજ્યમાં કોરોનાથી 20 ડૉક્ટરનાં મોત થયાં હતાં, પણ ઇન્ડિયન મેડિકલ એસોસિયેશન (આઇએમએ) પાસેથી ભાસ્કરે ગુજરાતના એ 95 ડૉક્ટરની યાદી મેળવી છે, જેમનાં મોત કોરોનાથી થયાં હતાં.

મંગળવારે લેખિતમાં સરકારે જણાવ્યું
મંગળવારે કેન્દ્રીય આરોગ્યમંત્રી મનસુખ માંડવિયાએ લેખિત ઉત્તરમાં જણાવ્યું હતું કે ગુજરાતમાં કોરોનાને કારણે 174 હેલ્થવર્કર્સનાં મોત નીપજ્યાં હતાં, જેમાં 20 ડૉક્ટર, 20 નર્સ, 6 એમ્બ્યુલન્સ-ડ્રાઇવર અને 128 પેરામેડિકલ કર્મચારીઓનો સમાવેશ થાય છે. જોકે આઇએમએની યાદી મુજબ, માત્ર અમદાવાદમાં જ 23 ડૉક્ટરનાં કોરોનાથી મોત થયાં હતાં, જે રાજ્યમાં સૌથી વધારે છે. સુરતમાં 15 અને વડોદરામાં 9 કોરોના યોદ્ધાએ જીવ ગુમાવ્યા હતા.

આરોગ્ય રાજ્યનો વિષય છેઃ મનસુખ માંડવિયા
ઇન્ડિયન મેડિકલ એસોસિયેશનના ગુજરાત ચેપ્ટર દ્વારા કોરોનામાં જીવ ગુમાવનારા ડૉક્ટર્સની યાદી રાખવામાં આવે છે. કેન્દ્રીય આરોગ્યમંત્રી મનસુખ માંડવિયાએ એક સવાલના જવાબમાં વિગતો આપતાં કહ્યું હતું કે આરોગ્ય એ રાજ્યનો વિષય છે. કેન્દ્ર સરકાર પાસે રાજ્યો દ્વારા આપવામાં આવતી કુલ કેસ અને મૃત્યુની વિગતો હોય છે. કેટલા હેલ્થવર્કર ભોગ બન્યા એ વિશેની માહિતી રાજ્યોએ નિભાવવાની હોય છે. તમામ રાજ્યો પાસેથી આ બાબતે વિગતો મગાવવામાં આવી હતી. જોકે એમાંથી કેટલા ડૉક્ટર કે નર્સ હતા જેવી માહિતી માત્ર 6 રાજ્ય દ્વારા જ જવાબમાં વિગતો આપવામાં આવી હતી.

ગુજરાતમાં કોરોનાથી જીવ ગુમાવનારા 95 ડૉક્ટર્સની યાદી…

(ઇન્ડિયન મેડિકલ એસોસિયેશનના ગુજરાત ચેપ્ટર દ્વારા ભાસ્કરને અપાયેલું લિસ્ટ)

• ગુજરાત સરકારે આપેલી વિગતોને આધારે રાજ્યસભામાં આરોગ્યમંત્રી માંડવિયાએ કહ્યું, ‘ગુજરાતમાં કોરોનાને કારણે 20 ડૉક્ટર્સે જીવ ગુમાવ્યા તથા 20 નર્સ, 6 એમ્બ્યુલન્સ ડ્રાઇવર અને 128 પેરામેડિક્સને પણ આપણે ગુમાવ્યા હતા.’
• …જ્યારે ગુજરાતના આરોગ્યમંત્રી ઋષિકેશ પટેલનો જવાબ – ‘મને આ વિશે કશી જાણ નથી’

રાજ્યમાં કોરોનાથી સત્તાવાર 10,740નાં મોત, સહાય 87 હજાર લોકોને ચૂકવવામાં આવી…
ગુજરાતમાં કોરોનાથી અત્યાર સુધીમાં સત્તાવાર 10,740 લોકોના મોત નિપજ્યાં છે. જો કે કોરોના મૃતકોને સહાય માટે અત્યાર સુધી રાજ્યમાં 1 લાખથી વધુ અરજીઓ સરકારને મળી ચૂકી છે. જેમાંથી 87 હજારથી વધુ લોકોને સહાય ચૂકવી દેવામાં આવી છે. રાજ્ય સરકારે સુપ્રીમકોર્ટમાં સ્વીકાર્યું હતું કે ~50 હજારની સહાય માટે મોતના સત્તાવાર આંક કરતા 10 ગણી વધુ અરજીઓ મળી છે. સરકારે 8 હજારથી વધુ અરજીઓ નામંજૂર પણ કરી છે.

હેલ્થવર્કર મૃત્યુ કેસમાં દેશમાં કુલ 1616 ક્લેમ, 808 કરોડ સહાય