ભાજપના એક નેતાએ પાર પાડ્યું ઓપરેશન ‘વિશ્વનાથ’:હવે યૂથ કોંગ્રેસના મહામંત્રીનું વિનયસિંહનું રાજીનામું, પૂર્વ પ્રમુખ વિશ્વનાથસિંહ વાઘેલા BJPમાં જોડાશે

વિશ્વનાથસિંહ વાઘેલાએ ગઈકાલે(4 સપ્ટેમ્બર, 2022) ગુજરાત યૂથ કોંગ્રેસના પ્રમુખપદેથી રાજીનામું ધરી દેતાં કોંગ્રેસમાં ભૂકંપ સર્જાયો છે. ત્યારે આજે ગુજરાત યૂથ કોંગ્રેસના મહામંત્રી વિનયસિંહ તોમરે પણ રાજીનામું આપી દીધું છે. કોંગ્રેસમાંથી રાજીનામું આપ્યા બાદ વિશ્વનાથસિંહ વાઘેલાની કેન્દ્રીય મંત્રી અનુરાગ ઠાકુર અને ભાજપ પ્રદેશ અધ્યક્ષ સી.આર. પાટીલ સાથેની તસવીરો બહાર આવતાં અનેક તર્કવિતર્ક શરૂ થઈ ગયા છે. આ શરૂ થયેલા તર્ક અંતર્ગત સાચી વાત જાણવા દિવ્ય ભાસ્કરે વિશ્વનાથસિંહ વાઘેલા સાથે વાતચીત કરી, ત્યારે તેમણે આખીયે વાતનો ફોડ પાડતાં જણાવ્યું કે હું ભાજપમાં જોડાવાનો છું.

‘હું ભાજપમાં જોડાઈશ, ક્યારે જોડાઈશ એ બપોર સુધીમાં નક્કી થશે’
યૂથ કોંગ્રેસના પૂર્વ પ્રમુખ વિશ્વનાથસિંહ વાઘેલાએ દિવ્ય ભાસ્કર સાથે વાતચીત કરતાં જણાવ્યું હતું કે હું ભારતીય જનતા પાર્ટીમાં જોડાવાનો છું. કમલમ ખાતે હું ખેસ ધારણ કરીશ, પરંતુ ક્યારે ભાજપમાં જોડાઈશ અને કોની હાજરીમાં જોડાઈશ એ વાત બપોર સુધીમાં મને ખ્યાલ આવી જશે.

तस्वीरों में खबर2 फोटो

સંગઠનના એક નેતાએ ઓપરેશન પાર પાડ્યું
હાર્દિક પટેલની રાહે વિશ્વનાથસિંહ વાઘેલા ભલે ચાલી રહ્યા હોય, પરંતુ ભાજપમાં લાવવામાં કે કોંગ્રેસમાંથી રાજીનામું અપાવવામાં હાર્દિક પટેલ નહીં, પરંતુ ભાજપ સંગઠનના જ એક નેતાનો સિંહફાળો રહેલો છે. ગુજરાત યુનિવર્સિટીમાં યુવા નેતા તરીકે પ્રસ્થાપિત થયેલા વિશ્વનાથસિંહ વાઘેલા સાથે જે-તે સમયે પરિચયમાં આવેલા ભાજપના આ નેતાએ જ સમગ્ર ઓપરેશન પાર પાડ્યું હોવાની વિગતો સાંપડી રહી છે.

સાત પાનાંના પત્રમાં અનેક પ્રકારના આક્ષેપો કર્યા
રાજીનામું આપ્યા બાદ વિશ્વનાથસિંહ વાઘેલાએ લખેલા સાત પાનાંના પત્રમાં અનેક પ્રકારના આક્ષેપો કર્યા હતા. તેમણે કહ્યું હતું કે કોંગ્રેસ સાથે જોડાવાનું સૌથી મોટું કારણ હતું કે નાનપણથી જ ઈતિહાસની ચોપડીઓ વાંચતા અને એમાં એવું ભણ્ચા કે કોંગ્રેસના નેતાઓએ આઝાદી અપાવી. તેથી કોંગ્રેસ પક્ષ પસંદ કર્યો હતો, પરંતુ જેમ જેમ પક્ષમાં કામ કરતા ગયા તેમ તેમ ખબર પડી કે જે નેતાઓએ દેશને આઝાદી અપાવી હતી એમાંના ઘણા ખરા નેતાઓને 1969માં કોરાણે મૂકી દેવાયા હતા. આઝાદી અપાવનારા જે નેતાઓ મારા પ્રેરણાસ્ત્રોત છે તેમના ફોટા પણ મેં કોંગ્રેસની ઓફિસમાં જોયા નથી.

કોંગ્રેસે મને જે પદ આપ્યાં એ વેચાતા આપ્યાં
હું ઘણા સમયથી હાલની કોંગ્રેસ એક પરિવારની ભક્તિમાં લીન હોય એવું અનુભવી રહ્યો હતો. કોંગ્રેસ પક્ષે મને જે કોઈ પદ આપ્યા એ મારી પાસેથી પૈસા લઈને વેચાતા આપ્યા, જેથી વેચાતા મળેલા પદ પર કોઈ વ્યક્તિને કેવી રીતે પ્રેમ આવી શકે. હું જ્યારથી યૂથ કોંગ્રેસનો પ્રમુખ બન્યો ત્યારથી જ પક્ષના સિનિયર નેતાઓના જૂથવાદનો ભોગ બનતો આવ્યો છું. યૂથ કોંગ્રેસમાં જે સિનિયર નેતાઓએ મારી મદદ કરી હતી તેમની સામેના જૂથના નેતાઓએ મને ટાર્ગેટ કરવાનું નક્કી કર્યું હતું.

પાર્ટીમાં 10 વર્ષથી જૂથબંધી ચાલી રહી છે
પરિસ્થિતિથી કંટાળીને મેં રાજીનામુ આપ્યું છે. મેં 3-4 દિવસ અગાઉ શ્રીનિવાસ અને ક્રિષ્નાને મેસેજ કર્યા હતા. તે લોકોએ મારા ફોન ઉપાડવાનું બંધ કરી દીધું હતું. હાર્દિક 3-4 મહિના અગાઉ જઈ ચૂક્યા છે. અમારી વેદના સરખી હોઈ શકે. નામ નહીં લઉં, પરંતુ કોંગ્રેસના સિનિયર નેતાઓને ખબર જ છે કોના કારણે છોડી રહ્યો છે. 10 વર્ષથી જૂથબંધી ચાલી રહી છે. પાર્ટીનો જૂથવાદ પાર્ટીને મુબારક. ભાજપ સાથે મારે કોઈ વાત નથી થઈ. રાજકારણ કરવાનું છે. મારી જેમ અસંખ્ય યુવાનો પાર્ટીથી નારાજ છે. મારી સાથે જેને જોડાવવું હોય તેઓ આવી શકે છે. વિશ્વનાથસિંહ સાથે ભાજપના પ્રદેશ કારોબારી સભ્ય અને ગુજરાત યુનિવર્સિટીના સિન્ડિકેટ મેમ્બર વનરાજસિંહ ચાવડા આવ્યા હતા.

Abhishek Raghuvanshi

+ Follow Subscribe