કોચ્ચિ-મેંગલુરુ ગેસપાઇપલાઇન:મોદીએ વિડિયો-કોન્ફરન્સિંગથી કરી શરૂઆત, કહ્યું- કેરળ અને કર્ણાટકમાં ઇઝ ઓફ લિવિંગ વધશે

વડાપ્રધાન નરેન્દ્ર મોદીએ કોચ્ચિ-બેંગલુરુ નેચરલ ગેસપાઈપલાઈનની શરૂઆત વિડિયો-કોન્ફરન્સ દ્વારા કરી છે. મોદીએ કહ્યું હતું કે 450 કિમીની કોચ્ચિ-મેંગલુરુ પાઈપલાઈનના ઉદઘાટનથી ગર્વનો અનુભવ થઈ રહ્યો છે. હું કેરળ અને કર્ણાટકના લોકો અને પ્રોજેક્ટના દરેક સ્ટેક હોલ્ડર્સને શુભેચ્છા પાઠવું છું. પાઈપલાઈન એ વાતનું ઉદાહરણ છે કે દરેક લોકો સાથે મળીને કામ કરે તો કોઈપણ લક્ષ્ય મુશ્કેલ નથી. એન્જિનિયરિંગના લોકો જાણે છે કે આ પ્રોજેક્ટને પૂરો કરવો કેટલો મુશ્કેલ હતો, પરંતુ ખેડૂતો, સરકાર, ટેક્નિશિયન્સની મદદથી એને પૂરો કરવામાં આવ્યો છે.

મોદીના ભાષણની મહત્ત્વની વાતો
ખેડૂતોને પણ મદદ મળશે
વડાપ્રધાને કહ્યું હતું, આ પાઈપલાઈન કેમ જરૂરી છે, એને તમે એ રીતે સમજી શકો છો કે એનાથી બંને રાજ્યોમાં ઈઝ ઓફ લિવિંગ વધશે. વેપારીઓનો ખર્ચ ઓછો થશે. આ પાઈપલાઈન અનેક શહેરોમાં CNG આધારિત સિસ્ટમને પ્રેરણા આપશે. ઓછા ભાવે ફર્ટિલાઈઝર બની શકશે. ખેડૂતોને મદદ મળશે. સ્વચ્છ ઊર્જા મળશે. કાર્બન એમિશન ઓછું થવાને કારણે પ્રદૂષણ ઘટશે, લોકોનું સ્વાસ્થ્ય સારું રહેશે, બીમારીઓનો ખર્ચ ઘટશે. શહેરમાં ગેસ આધારિત વ્યવસ્થા થશે, ટૂરિઝમ વધશે.

વિદેશી મુદ્રાનો ખર્ચ ઘટશે
ફર્ટિલાઈઝર, કેમિકલ, વીજળી જેવા ઉદ્યોગ વધશે. દરેકને તેનાથી લાભ થશે અને રોજગાર વધશે. જ્યારે પાઈપલાઈન પૂરી ક્ષમતા સાથે કામ કરવા લાગશે તો વિદેશી મુદ્રાનો ખર્ચ ઘણો ઓછો થઈ જશે. સમગ્ર દુનિયાના એકસપર્ટનું કહેવું છે કે,21મી સદીમાં જે પણ દેશ કનેક્ટિવિટી અને ક્લીન એનર્જી પર ભાર આપશે તે ઝડપથી નવી ઉંચાઈ પર પહોંચશે.

યુવા ભારત ધીમે ન ચાલી શકે
આજે હાઈવે, રેલવે, મેટ્રો, એર, વોટર, ડિજિટલ કનેક્ટિવિટિમાં જેટલું કામ ભારતમાં થઈ રહ્યું તે આજ પહેલાં ક્યારેય નથી થયું. આપણું સૌભાગ્ય છે કે આપણે આ વિકાસ થતો જોઈ રહ્યા છીએ. આજનો યુવા ભારત ધીમે ના ચાલી શકે. પાછલા અમુક વર્ષોમાં દેશેએ સ્પીડ, સ્કોપ અને સ્કેલ વધાર્યો છે.

2014 સુધી 27 વર્ષોમાં માજ્ઞ 15 કિમી ગેસ પાઈપલાઈન બની
ભારતમાં ગેસ બેઝ્ડ ઈકોનોમીને લઈને જે કામ થઈ રહ્યું છે તેમાં પણ ઘણાં તર્ક અને તથ્ય ખૂબ મહત્વના છે. આપણાં દેશમાં ઈન્ટરેસ્ટ ગેસ પાઈપલાઈન 1987માં શરૂ થઈ હતી. ત્યારપથી 2014 સુધીમાં એટલે કે 27 વર્ષમાં ભારતમાં 15 કિમી ગેસપાઈપલાઈન બની છે. આજે પૂર્વ, પશ્ચિમ, ઉત્તર અને દક્ષિણમાં 16 હજાર કિમીની પાઈપલાઈન પર કામ ચાલી રહ્યું છે. થોડા વર્ષોમાં આ કામ પૂરુ થઈ જશે.